金山比喻(馬友 ray ray 提供)
多謝 ray ray 兄提供(11-06-99)

  賭馬知識就好似一座金山，越高既地方就越多金，山頂就是一大片黃金地．馬會
就好像一個提供攀山用具既公司，任何人都可以用佢ｄ工具，有ｄ工具係好既，有ｄ
就係爛既，有ｄ就有機關既，有ｄ直頭會出蠱惑既，至於點用同好用唔好用，就要自
己學習同研究．

  而金山可以不斷咁有咁多金，全靠呢間公司收既入場費，除左本同利外，呢間公司
會全數放番ｄ入場費落呢座金山．而呢座山因於太多金，間唔中會無啦啦碌左ｄ金落
山，好彩既就可以撿到，但多數人都係唔好彩既馬迷就係一大群攀山者, 有ｄ咩都唔
識，只係俾左入場費就企係度，搏有金碌落黎有ｄ人就係抱住玩玩下既心態，人爬佢
爬，根本只係識得一ｄ好簡單既上山技巧，就學人爬．

  有ｄ就有過爬山經驗，但係成日爬爬下碌番落山，碌唔死又爬過，從來都唔唸下點
解成日碌番落黎, 有ｄ就碌過又唸過點解，再爬過又真係爬得高左ｄ，而且個度都開
始有ｄ金沙撿下，滿足左一排，又再碌番落山, 有ｄ就只係得幾套爬山方法，真係可
以爬到去山既中間架，不過就唔可以繼續上，因為佢地唔肯轉一轉路線和學多幾種方
法．

  仲有部份頭先個種人，爬到咁上下，直頭冇晒心機爬，自封其頂，仲叫ｄ係下面爬
既人唔好爬，因為以佢既經驗話佢知，見到太多人碌落山，仲有ｄ慘死左，所以苦口
婆心叫人唔好爬，不過佢見唔到山既另一邊已經有人爬得比佢地更高．

  另一邊山既人,有ｄ會話你知點解爬到去呢個地步，不過多數都唔會話你知，好野都
唔會益你啦．有ｄ直頭拋離左你，一路爬一路撿，口中仲唸唸有詞話:多謝喎，魚腩們．

  咁點先可以爬到頂呢?其實試唸下，工欲善其事，必先利其器，你對ｄ工具熟習左，
咁你就更有把握，就連ｄ暗格你都知，咁你就起碼開始有成功既基本條件．加上不斷
去練習爬山技巧，咁就可以事半功倍．但由於呢庭山實在太迂迴，太難爬，即使你有
齊各樣條件，有時亦都會遇正ｄ鬆既泥土，令你好易爬到咁上下高又撻番落黎，所以
千祈唔好弧注一擲將重心放係一隻手度，要試清楚係唔係實淨先好放膽上，即使真係
鬆既都仲有一隻手，兩隻腳頂住丫嘛．

  當然要熟習所有工具係要時間，加上呢間公司又成日換工具，天氣又會令上山既路
成日唔同，所以成日都要update自己，不斷學，不斷研究，先可以保持你既高度同有
本事繼續向上爬．

  至於最後爬唔爬到上山頂，除左睇你叻仔唔叻仔外，最主要都係靠努力．當然身邊
如果有人支持，一同上山，互相扶持，交流心得，就最好不過啦．肯學肯爬，唔受旁
人騷擾，不怕失敗，只要識得係失敗中吸取教訓就得．　

  至於可唔可以專心去爬，就各有各唔同，有ｄ老婆,女朋友唔俾爬，有ｄ因為要爬
第二個山，無時間爬，有ｄ就撻到死下死下，唔敢再爬，太多原因，不能盡數，各有
各不同．

  朋友，咁你又係邊類人，而家又爬到邊呢?

  rayray 

完