何 宿 空 間 —— 我 的 宿 舍 生 活
在中大的三年，我有幸都可以有宿舍住，而我所住的，就是當年崇基學院內的第二大宿舍 (宜家因為多了一間叫 "五旬節會堂"，所以變左做第三大) ——何善衡夫人宿舍，亦即是中大人所講的「何宿」喇。
何宿和其餘兩間崇基宿舍：文質堂同利樹培堂 (又稱「利宿」、「新宿」)，座立於崇基的一個小山丘上，三間宿舍圍住的中間有一個大草坪，是為「何草」，而何宿另一邊則是靠近主車路，住在這邊的或會被一早的車聲嘈到，但很快便會適應——更包你就算早上繁密的校巴都唔會叫醒你返學，因而無端端走堂！
誠然，這三年的宿舍生活都過得很愉快，但最初未領略宿舍生活的真正樂趣前，竟覺得宿舍是．．．
宿 舍 故 事
楔 子
小小的一間二百呎房間，住上了兩個來自不同地方的人，但這裏，卻成了屬於自己個人的第一個私人空間。這，就在何宿的其中一間房內——我所住的一間房。
雖然不是偌大的地方，但我愛上這裏：可以在這裏看看出面吐露港的景色；或是和其他宿友聊天；又或是對著窗寫寫自己的樂曲、彈彈小提琴和練鼓；更可以發一下白日夢，自由自在，做自己愛做的事情。
三年的大學生活，佔了不少時間都是在宿舍中度過的。每過一年，我對宿舍的喜愛就更多一點。它曾幾何時，成為了我第二個「家」。但，當未真正領略宿舍生活的真正樂趣前，宿舍生活對我講是一個惡夢．．．最初的兩個月，自己其實是很不習慣宿舍內的生活的。
( I )
第一年很幸運地抽著要住地下．．．這一層只有七間房在一邊翼，其中四間又未有人住，而且又近客廳和打機位，出面何草晚晚又有很多人聚集聊天，嘈到覺也睡不到，再加上其他層的人又擅用這層的設施，用後又不收拾手尾等，而當時那些宿生會的成員，大部份又給我一個凡事好理不理的印象，這都使我對宿舍的印象很不好。（最初的一、兩個月更寧願帶衫回家洗也不敢用宿舍的洗衣機！）又加上不是太過認識其他宿友
(就連和同房也是比較拘慬)，所以很多時都留在房裏，或是留在音樂系內到很晚才回宿舍。
星期六，很多宿生都會回家渡週末，這天的晚上會比其他日子較為寧靜。有一次，我因為第二天一早要出中大社工隊的組，所以便留了在宿舍。獨個兒在大廳裏看電視時，我的一位音樂系師姐（她亦是當時宿生會的莊員）剛巧來到客廳．．．買汽水，我們便閒談起來：從我是否習慣大學學習，到在宿舍的生活。我向她反映我不適應宿舍的生活時，她就這樣對我講：「想晌宿舍過得開心就唔可以成日摺埋o架！呢o的o野一定係靠自己主動，多o的出o黎大廳蒲，其他人就算唔識你，至少都俾佢o地知道你的存在嘛！久而久之就會打下招呼，好快就混熟喇！」
後來，聽師姐的話，多了出大廳；又多了出席電影會、糖水會；玩舍音、傅盃；再加上她少少的搭橋，漸漸認了一些宿友，而同層的其他房又住滿了，和同房又稍為熟落了，十多個小伙子又會晌個wing度吹下水，玩下，漸漸地便喜歡了宿舍的生活和環境。那年的聖誕大家更夾錢一同把個Wing弄得滿有聖誕氣氛，很正！
( II )
到了第二年，因為舊同房飛起o左我同佢o既舊同學同房，加上原本o既地下班又上晒二、三樓
(再次多得幸運的抽房先後．．)
結果成層一樓就得我番同另一個「地下宿生會」(當時我地一班住地下的兄弟改嘅)晌度，所以一方面除o左換o左個新同房外，另一方面又要重新認識過一班新嘅宿友。
真的要感謝上天這次特別的安排，竟然很快地便和絕大部份的新宿友熟落起來，玩得比去年更放更癲。無他o既，因為除o左我呢個其實幾玩得之人外 :P，自己 wing （一樓中翼）附近幾個都係咁玩得嘅，有住對面房的 Roland 同 文強；隔離嘅阿煒、阿 Keith、威哥同飛龍；斜對面的蕭 SIR、亞揚等，都係又玩得，又傾得之人，真係唔錯。同時，透過他們也漸漸認識了同層的其他人：Martin, Daniel, 阿強、阿德等人。入伙酒那天，一樓的兄弟組成了「一樓鄉事派」，大玩特玩呢！
當然最重要嘅都係我嘅新同房啦！真係唔駛點講，佢可以用一個「正」字就代表晒。這個讀歷史系的同房——麥精，不但閒談起來甚為投契，更加是平日互相照應的好手足。好多時都係因為佢，我先至唔駛成日走晒的朝早堂！ (因為佢不嬲都早起身。) 雖然，我認自己很多時都會因為遲返宿舍而令他經常獨個兒悶，但大家一有空時 (多數會在晚間／半夜) 都會作深入的交談。所以，當大家各自有自已的困難而感到壓力、無助時，都可以互相扶持，這實在是我宿舍生活中的難得經歷。
( III )
過了不久的一個夜晚，獨自一個人留在房裡溫習
(麥精那天回家去了)，亞揚走過來話有點事想和我傾傾，是問一些關於去年宿舍活動的情況和一般宿生的活動云云。那時我以為他只是想更了解一下宿生的生活罷了
(新生畢竟不熟識吧)，便和他談了頗長的時間。傾後自己也倒不以為然——實在他問了很多，有些連我也答不到呢。過了幾天，他又走過來我的房
(恰巧麥精又不在)。最初他說來看看我在做甚麼，及後他又把房門閂了
(慣常地我們是把房門打開的)，弊！佢究竟想點呢．．．
「我想邀請你加入我們的候選宿生會內閣。」亞揚少有的很正經同我講。
「咁都唔駛閂埋房門講咁誇張嘛．．．」我那時還有點驚！
「呢啲嘢唔方便咁張揚去講嘅。」原來他被人推舉做候選堂主
(即 chairman)。
即係咁，自何宿 o-night (迎新夜)後，一班「一樓鄉事派」和幾位其他層的朋友有意組成下屆宿生會，但是，他們當中幾乎全部都是新人（絕大部份都係一年級新生，另外雖然有三位二年級，但全都是第一年住何宿），對不少事都缺乏認識，所以極想找一些舊宿生來幫手，以免給人對「新手上路」欠缺信心。
「我想我要時間考慮一下。」
「Francis，你也對我們沒有信心了？」
「不是... 但我今年還當了其他 soc 的職務，我怕我沒有時間應付來。」
「我們需要你，你話晒都係何宿的舊人，有資歷，有助我們和其他老鬼溝通，而且你比我們有經驗，看事也較全面，可以看到我們有什麼不足...」
「多謝你的賞識，但可否給我時間考慮一下？」
「好吧！我們才開了一次會，如果你想加入，請聯絡我吧！」
亞揚走後，我獨自在房內回想：其實，自己原就是打算想入來年的宿生會嘛！現在既然有人主動找上來，為何還說要考慮呢？
但太湊巧的是... 其實當時正正另一個候選莊也同時正招攬我入他們的內閣！
( IV )
先交待一下背景。
很多時，大學任何一個莊，絕大部份都係自動當選的：因為通常只有一個候選莊。只要他們在投票時符合最低投票人數，再加上有過半數會員支持，就可以上莊。有兩個莊同時爭唔係話未試過，但通常都唔會出現咯。絕大部份原因－－都可以話係新莊會由現屆的人扶植上去，咁又點會出現兩個莊呢？除非上一屆可能出現內鬨，咁就會出左兩個莊撼啦。當然，亦有可能係當時真係同時間有好多有理想的人，想幫手搞活動，咁出現兩個莊都唔出奇，不過，我強調呢種情況只係好... 好少數囉。
好，講下另一個候選莊啦！其實部份的成員，我都是認識的。那邊的候選堂主是 95 O'camp 的其中一位大組長，那一年我做集訓 core 時，也和她合作過；副堂是文宣 core (CC O'camp 獨有的，暫不下表)，經常落我的大組搞氣氛；而其他成員又有幾位是 95 O'camp 的輔導員、文宣和大組組仔，更有一個是去年大Ｏ同組的組員呢！而且，他們都是去年何宿宿生，認識也是很自然的事。他們的一組就是透過那位和我大Ｏ同組的組員去和我相談加入他們一組的事宜，不過坦白講，佢同我唔係講左好多，大抵是他們有意願組閣，想睇下我有沒有興趣加入云云...
講牌面，另一組多舊人，某幾個的公關手腕很強，後台也夠 (至少得到了前屆莊的支持)，肯定比亞揚的一組強。但是我又想：那邊既然多舊人，多我一個的也不過是錦上添花呢，亞揚的一組，雖是欠缺一些舊人壓鎮 (正堂和副堂都是新鮮人)，但給人一份活力和新鮮感，可是，我也不得不承認這邊新人多，或許真的給人一個弱勢。
再去想想，其實兩方看著我，或許也是基於一些戰略策略吧！大組長那邊想以我去拉攏一樓和地下的新生票；而亞揚就想藉我去拉攏其他層的老鬼和游離票 (容後解釋)；而我又想入宿生會。既然大家都有既想得到之利益，那當然看看和那一組夾是最能令兩家都相羸啦！(估不到在大學就要學曉社會上做事講利益的手段•••)
當時我的心情真的很亂，想用拖字訣，但又知唔可以拉得太久；坦白的說，入宿生會多少也為了畢業年都可以有宿住，服務宿生的心固然是有，但一定不是放在第一位。面對此，究竟如何選擇呢？
( V )
一日，在校園內遇見了另一位在九五 O'camp
一同處事的朋友。大家晌眾志二樓傾番大Ｏ的情景，傾傾下便講到那位大組長身上。
「佢好似諗住做下一屆我地何宿堂主喎...
」我講到。
「唔係嘛？佢「咁好」 都做到？」我的朋友很驚訝的道，「佢O既作風同埋處事手法晌
O'camp 都已經唔係好得人心喎。
「係咩？... 唔會卦？
「你個時冇開會咩？佢成日俾埋晒Ｄ所謂建議，唔係齋
Talking；就係不知所謂的建議！你唔記得佢個時話
O'camp T-shirt 用白色，又薄又透，如果整濕o左，女仔好易走光云云，咪俾其他人窒到佢飛起，話：咁不如著冷衫啦。
「好似又係喎...
「仲有佢果時諗Ｄ O'camp 口號唔夠人撼，就用埋晒Ｄ
"好悶、抄襲、老土、收檔" 咁o既悔氣說話，好令人反感嘛！仲要係全部佢諗出o黎。
「班輔導員都話咁唔係太好，不如用其他啦，但全都俾佢
BAN 晒，總之乜都要由佢話晒事。雖然係大組長o者，咁Ｄ輔導員都係想幫下手嘛。但佢都唔多聽班輔導員的意見，好霸道囉。
「咁我都好似有聽過，但係唔諗住原來咁大件事喎...
「平時我地就話：冇謂搞大佢啦，俾Ｄ組仔見到自己組內哄，好好睇咩？但係個個咪留番開大組Ｅ時
"插" 佢囉，再加埋晚晚開集訓Ｅ連其他人都一齊
"片" 死佢o者。
宜家我地搞親聚會都唔叫佢囉，反正我地圍內玩得開心咪算數囉！冇佢係度又唔係搞唔成。我地宜家都唔當佢係阿頭喇。
「咁都幾絕喎...
「都係佢自討苦吃o者，活該啦。如果佢第時做埋堂主，容乜易又來過
O'camp 翻版？佢個形象咁差，我係你就唔選佢囉...
就係那位朋友的意見，我最後咁就決定加入了亞揚的那一個候選莊。而那位大組長的一邊也揍夠了人，撼莊已經係成了一九九六年度何宿宿生會選舉的重頭戲...
( VI )
「請支持『為『何』上莊！』...
「請支持『ｘｘｘｘ』... (網主按：唔...
諗諗下都係唔打佢個真名出o黎會比較好 D)
兩個候選宿生會，在宿舍內每一處地方都放滿了各式的宣傳物品：Banner、海報、Table-stand、門牌呢 D 指定動作之外，更有其他的招數。然而這些招數卻成為了兩莊互鋤的導火線。好似對手就整了一張近十多米的直 banner，掛晌兩邊樓梯的天井位，係就好突出，不過原來咁唔單止係違規（原來晌天台 dum 落o黎，一方面阻礙天窗陽光，二來呢條既是日常上落樓梯，又是走火梯，校方話咁掛條長布條，即係擺放易燃物件，一有火災就大件事云云...) 另外，對手又 [乙水] 掂某些校工，晌佢地平日入汽水和紙包飲品期間，把它們的宣傳標貼貼在飲品上，當宿生買汽水時，就會買到有他們的宣傳標誌的飲品 (本來呢個係有 D 灰色地帶，但係後尾聽講話當中唔係咁簡單，搞到 D 工友俾社監鬧左一大餐) 等等。
我呢，好坦白咁講，可能唔係做大啦 (當年我係做候選群育... 其實話明叫做負責宿生的宿舍活動統籌事宜，實質主要就係負責搞糖水會兼且煮埋)，又或者同對手都冇乜話特別大仇口，我又唔覺得有咩咁嚴重，不過，我Ｄ拍擋好多都好勞氣，成日話佢地玩 o野，收買人心 (-____-!)，好似好多積怨咁... 開親會都話要諗對策，結果我就通常都係就咁坐左晌度聽佢地發表偉論...
至於諮詢大會，也沒甚麼好談，大抵又是兩邊的支持者早已疊晒馬齊習在何宿大廳內，互相質詢。初則講政綱理念，講活動內容，及後開始滲入了種種個人、團體之間的恩恩怨怨：由選舉期間的種種涉嫌違規行為；到質疑由一年級做堂主能否有說服力、個別候選人的以往的工作能力和個人品格等；甚至見你係某個系的，就叉你「平日都好夜先返宿舍，究竟你會唔會放時間晌宿舍度？」「係咪呃宿分o架」；有時，支持者又會特定要求某些候選人答一些和他們工作無關的問題，好似總務答體育問題、文書答群育的工作、或是每個人都要講自己的上莊理念云云。結果成個諮詢會拖到死咁長，差Ｄ舍監要出面話 CUT (還未計主持人 reject o左好多無厘啦更的問題) 先至完到。唉！
其實還有很多，但記也記不清了，我只想起是：諮詢後，差不多晚晚都要開會。其中，花上不少時間講形勢、講策略、以及分析每一層，每一間房，以及每一個宿生的投票意向，計下究竟可以得到幾多票，有幾多游離票，有幾多人係可以拉佢改投我們，又或者要有專人吼實唔好俾某些人張票流走左。之後又要檢討番我地o既工作計劃有沒有問題，有沒有更改的環節，最後... 就係宵夜團，成班莊員出去大埔食下野，稍作鬆馳。
想不到，堪莊比那些自動上莊的，辛苦不知多少倍！
( VII )
時間一天又一天的過去，距離正式投票的時間也越來越短。
各種為選舉的大小事務、開會和工作，再加上本身的功課和其他莊務 (中大社工隊和崇基合唱團)，完全佔據了我的絕大部份時間，至於阿揚和一班當核心的，更加是忙得緊。除了本身候選莊的事外，還到處打探對方的實力。
「游離票很不穩定，很多宿生現時似乎都當騎牆派靜觀其變。」副堂
Martin 說。「如果呢幾日沒有太大的變化，或者對我們來講很不利，因為如果他們傾向穩定的話，他們倒會選另一邊。」
「雖然得到了現任堂主那邊的支持，但再上任堂主那邊的實力也不能忽視。」亞揚道。「再者，那些
Medic 人也很難捉摸，如果可以吸引到他們再加上得到他們的信任兼出來投票的話，那會較好。
「還有那個長 banner，雖說這件事對他們的形象有一定打擊，但其宣傳效用卻遠比打擊為強。
「Francis，去年和你一齊的那邊舊宿生的取態怎樣？」亞揚問我。
「其實都很難講，因朗文 (即去年 O CAMP
的同組，入了對手的一組) 和其他 Engin 人都很熟絡，我雖然得到了個別宿友私底下講會投我地票，不過我覺得還不能太過信靠，畢竟未到最後一分鐘也不知會否改變主意。而且坦白講，我們彼此之間都叫做有互相聯繫，也可要考慮消息會否轉流了過去而影晌了我們的佈署。
「也對，但你要知道他們的票的確起到了很大的作用呀，還是要辛苦你努力的游說了。」亞揚道。「再者，舍音盃
(註：即每年的崇基宿舍歌唱比賽) 也快到了，我知道堂主已經為我們兩組人都報了名出賽，這是一次表現我們實力的好機會。論音樂，Francis
你這個音樂人一定走不掉的了，或者待散會後我再和你傾傾細節吧。
開完會，大夥兒過了天外天吃宵夜，阿揚也跟我談了舍音盃的細節。他本身屬意把當年的「新扎師兄」歌詞改編一下來切合何宿 (按：這裏要容我交待一下。阿揚本身可以說是警隊世家，世伯乃當年警隊人士，很自然他對一切警察事務都感興趣。畢業後順利成章地加入警隊，現時聽講已是高級督察，事業人工兩得意，比起小弟呢Ｄ半天吊的實在好得多了)。結果再加入其他人意見，最後由改編自「紅日」和「新扎師兄」而成的「何宿之歌」(我承認，歌名的確是「娘」了一點，不過呢Ｄ擺明係政治任務，為了交心，「娘」都無辦法 ---> 幸好當年沒有留底，免得俾人拎出o黎笑) 作為小組唱；另外，又認投了大組唱項目，整左隻「足球小將」( -___-: ) 之餘仲要幫社監整個結他和絃出黎 ( >__< ) (皆因社監鐘意彈結他... 係崇基人都知，年年舍音盃都一定要安排社監彈結他先得)。
小組唱倒不是問題，最慘是大組唱，對手一莊作為隊員，不知是故意與否，總愛找一些話柄來講，呢樣果樣都有問題，搞到我呢個所謂負責人真係好無癮，心想：快快趣趣過左佢就唔鬼理你地喇。
結果，當晚小組唱和大組唱都同樣得到了第三名，算係有點成績交代了。
( VIII )
經過了個多月的日子，新一屆的宿生會投票終於開始了。
本來在投票之前的兩三日，發生了另一件事，結果氣得亞揚和 Martin 等人把我們原本的宣傳 banner 字句換成為對另一候選莊的不滿，但似乎是他們個人的恩怨多一點，而且說實話：當時我也沒有理會這單爭執的始末，總之就係有Ｄo野啦，唉！
投票前，除了本身的洗樓外，我也私下的寄了一些電郵俾部份當年「地下宿生會」友好，希望用下友情票來箝一下票源啦。坦白講，個人其實很怕做這種交際性的活動，總是感覺利用了友情作為一些賭注般，個人唔係咁接受得來。但為了為「何」上莊， 又叫做曾經有做過o野，就做一次咁多啦！
終於到了投票的日子。整個投票期為期三日，期間各候選莊不能再有其他附加或臨時的助選活動。每天票站都有現屆宿生會的人員在監票，而每日投票後，又會把票箱交由工友保管以示公允。這次選舉，全宿二百二十六人中，有超過了二百人出來投票，差不多是九成的投票率，真的是很高耶∼∼
投票過後，我們兩候選莊、舍監、助理舍監和湊熱鬧的宿生會齊集在大廳，見証數票的一刻。舍監開了票箱後，助理舍監便逐一讀票，所有問題票，則交由另一位助理舍監及兩候選莊的驗票人來確應。兩候選莊的名稱此起彼落的叫著。當其他莊員正很緊張的數著自己或人家的票有幾多時，我 就只是企晌最後面，腦海那一刻好明顯是一片空白...
「點票結果已經有了。」負責這次投票的宿生會幹事宣佈。「〔為『何』上莊〕得到了 110 票，ＸＸＸＸ得到 98 票，我現在宣佈〔為『何』上莊〕當選為新一屆的宿生會...」結果我們只是以十多票勝出。亞揚等幾個重要夥伴高興得互相擁抱起來，我們在後的也叫作鬆了一口氣，互相擊掌鼓勵。結果作實後，另一邊的候選朋友也前來握手祝賀，畢竟，在民主選舉中，有得有失是認同的遊戲規舉。
當晚，不少宿生都一同出大埔宵夜，大家都盡情吃喝一番，而我們也要逐一向各宿生－－不論是否支持的都銘謝一番，去到競選對手的一圍，大的自然要客氣寒喧一輪，而我則和朗文私下互敬，雖是對手，但最後本來就是一番朋友吧！
(未完待續)
最近更新時間：29-12-2003 04:34:01