我 迷 上 了 波 鞋 我 迷 上 了 波 鞋
你問我幾時開始玩波鞋？計下計下都係得三年幾 (要識賺錢先得o架)；不過，講到留意呢，睇怕都係由小學開始o羅！
嘩！ 咁細個就咁鬼物質主意o拿？唔知呢．．． :P 其實都係因為以前曾經未擁有過吧！
有一次，我在教員室內向操場外看，一班籃球隊的成員正在練習，其中有一個穿的竟是 Pump Fury 的成龍國際版 (著跑鞋打籃球？ fO....o)。到休息時，成班隊員圍住他，不斷的要按壓那兩個氣泵，把氣囊泵得脹滿的，又按那個放氣掣，「咋」的一聲把充滿氣的氣囊都放了氣；而鞋主又拿起那枝氣槍，又入氣，又放氣，總之就像是一班大細路把這對鞋當是一種新的玩具，不亦樂乎！
又有一次，我帶校內的童軍去旅行，當日我著住對紅黑佐敦十二代，一出操場，那班小霸王就「嘩」一聲的在叫囂。「阿 Sir 著佐敦呀！」有一個仲同我講：「阿 Sir， Jumpman Pro 好著過 Air Jordan 喎，我欠一隻色就集齊全套喇！」我心想：你都幾闊綽喎 (係咪父母出錢就另話啦)。
記 得 年 紀 小 時 候
宜家o既小朋友真係好幸福，出街成日見到o的細路，十一、二歲（有時甚至八、九歲），腳踏住各款波鞋的的少年版 (仲要係行貨)： Jordan, Penny, Uptempo Max 等。 什麼龍珠、美少女、甚至是閃燈波鞋已經滿足不了他們的心靈。看！他們配上 T-shirt 短褲，神氣地炫耀著那對名牌鞋，不時弄弄鞋帶，或是刻意的用力去壓踏那個全氣塾，所做的就跟一般十六、七歲的青年無異。
回想起來，我的童年卻沒有這種情況。家庭雖非大富大貴，但一直以來亦可算是富足，很多東西，父母都能夠滿足了我們。但是，就只有買波鞋，他們總是耍手擰頭的。
「波鞋唔著得返學ｏ架！」「出街著皮鞋就得喇！」「打波？白鞋咪都得？買多一對放晌屋企阻住晒。」「人地有你就要有o架？」總之，好多的原因搬出來話唔買。
年紀小小的我早其實已覺得有對波鞋係好靚、好威o既 (諗下日日著皮鞋，三五七年再靚都覺得悶啦！)同時見其他小朋友都有我有的心態，係有o的唔鐘意喇。仲記得有一年有得入營，大伙人都穿著波鞋玩，只得我仍是白飯魚走天涯，甚為無癮。
特 別 的 搜 集
為了稍稍滿足我這個貪心的小慾望，當時藉著小學時有搜集郵票的方式，學會了一種叫「波鞋圖片搜集」，夠特別吧！其實是在一些彩色雜誌中，剪存一些波鞋廣告，又或是一些藝人或運動員較大張有穿著波鞋的圖片，閒時慢慢品嘗，就是當自己有擁有過吧！不騙你，我曾存有三大本！但很可惜，在一次搬屋中全都失掉了 :( 現在僅存有的一張，是一個穿著 Diadora 波鞋玩陸上風帆的，確是有型。
小學時期的珍藏就剩得一張，但中學時期卻仍有不少呀！我有 Air Jordan 第五、六、七代的廣告，也有Reebok 八九年推出的 Pump 廣告，這些都是很有價值珍藏啊！
到稍為大個一點時，除了圖片搜集外，我亦會錄下一些波鞋廣告作資料的，但是數量卻不多，要知道我們這些一般觀眾怎會知道那個廣告會在何時播？所以很多時要開著錄影機去「捕」它的出現！這種「守株待兔」方式都幾辛苦o架！
我 的 第 一 對 波 鞋
轉眼便到了小學六年級！以我知有不少學校都會為六年級的畢業生搞一個畢業退修營，美其名就係話俾我o地認識一下中學的學習生活，有o的心理準備，兼俾我地可以在課堂以外鬆馳下；實質呢，未又係聽埋聽埋o的重覆又重覆，內容又悶o既講座！
臨出發前的幾日，學校派了一些入營前所需要的物品清單：要帶甚麼日用品呀，衣褲鞋襪等等。其中有一項當然是要帶備運動鞋啦！我把清單交給爸媽看 (通常他們都會為我預備好一切的物品)，媽媽見到要帶運動鞋，就說：「帶對白鞋都可以吧！」
我就答：「唔知呢．．．不過好似有一日會行山(路)喎。」
「咁就唔好著白鞋喇，o的碎石好易會『銀』腳 o架！買對厚底波鞋吧！」爸爸突然的說了這一句。
就係咁，第二日媽媽就和我到鞋舖買鞋，「就買一對平平地的吧！嘩！乜要成幾百元一對的？」媽媽這樣的對我講。咁我第一次都唔會咁心o既，就買了一對價值數十元的 KAMACHI 波鞋，而我也終於擁有了第一對波鞋。
我 的 第 一 對 跑 鞋
升上中學後 (冇錯，就係赤柱聖記——赤柱聖士提反書院)，因為體育堂有好多不同類型的運動玩 (學校的體育堂是跟據時節而編的。九、十月係游水；十一、二月係越野跑；一、二月係田徑；三、四月係球類；五、六月又游番水)，加上校方沒有規定一定要穿什麼鞋，因而穿波鞋的機會也較以前多。也正因為此，不少同學都會藉此機會來「晒o野」——雖則聖記在七零年起已成為一間政府統一派位的津校 ，但不少人至今仍覺得它是一間「貴族學校」，入面的學生都是非富則貴囉。尤其是水、陸兩運會，簡直就是晒欄咁滯。再者，由於每次上堂前大家都在更衣室換衫，邊個著新鞋係逃唔過我地每一個o既眼o既•••
「有錢仔！著 180 跑 X-country (即越野跑), 鬼唔望一陣俾o的尖石拮穿你個 Air 喇！」
「嘩！死仔著對 pump 返o黎打波？除出O黎俾我地玩o下，睇o下會唔會 pump 爆先．．．」二話不說，幾個大漢一手揪起當事人的四肢，夾份除o左佢對鞋出o黎魚肉一番...
自那對KAMACHI之後，中二那年我又換了對PUMA的便裝鞋。本來一對都可以應付o既，不過，一到越野跑就弊喇！始終對 KAMACHI 同 PUMA 都係普通底，比較硬，而越野跑要成日上山落山，快都要兩零卅分鐘係咁跑，對腳梗係辛苦啦！次次跑完仲搞到o的腳指出晒水泡，非常痛。結果點都要同亞媽講要另外買對跑鞋，唔係就日日查藥都唔掂。就係咁，我就買到了第一對跑鞋—— Reebok o既 ERS 2000 喇。呢對鞋的意義可大了：因為這是我第一次自己走去買 (但係都係阿媽俾錢o既)。而我又貪佢黑配螢光綠幾 sharp，價錢比 Air Max 平，再加上當時 ERS 係 Reebok 當時o既新產品，諗住冇乜人有啦。之不過，其後我才發現有好多人也同樣買了這對，至少在我班就有另外三個都買了同一色的。四個人一齊撞鞋，都幾怪。
"Pump" the sneakers out
「張德培慢慢的走進球場，彎下身，用姆指按壓穿在腳上那對
Tennis Pump 的氣囊：
一下、兩下、三下•••」
當然鞋著了一段時間，就會變舊，而且也開始爛。也就即又是換鞋的時候了。今次買甚麼款好呢？
想起我校愛打籃球的人都不少。學校雖然有十多個場，但每天都被人借滿，可見其熱門程度。尤其是宿生，每日放學後回宿舍便立即換衫落場鬥波。
對了，我想要的就是一對籃球鞋！它那高筒型的設計，配上了背心波衫和波褲，很是帥的。但是，買那款好呢？
同班有個打籃球很叻的同學，是 Air Jordan 的忠實 fans，每次買波鞋都指定是買 Air Jordan。再加上一出新一代就會第一時間買下來著，無謂又撞兼俾人話啦！至於其他，不是 Air Flight ，就是 Air Force，同樣也大濫了。所以我決定買了一對當時都算流行，但很少人會買的鞋款： Reebok Pump。
Reebok 於 89 年推出了第一對 The Pump，利用鞋舌上那小小的充氣泵，把空氣注入藏在鞋舌內的氣囊，令鞋和腳間更為貼服。但許多人試過都嫌它重手，不利打波，而且價錢亦貴 (當時最貴要成 1299 元) ，固此，很多人都不愛穿它來打籃球。買它的反而是作外出便服穿著，因為那個橙色的充氣籃球泵仔很型很搶眼，青少年更以此「身份的象徵」為傲。不時都會像廣告般，高調地將它按壓數次，又或是如上面所講，重覆又瘋狂的泵漲完就放走所有氣。
真的是貪新鮮的原因，結果我用上了幾個月的零用錢，花了七百多元買了一對 Blacktop Pump -- Plateau Pump。這是一對以白色為主，再配上綠色的中筒型。氣囊是腳面型的。記得為了可以在每次著時多按幾下，還特意地買了大一個碼呢！穿起來的感覺真的很特別，因為你感到氣囊是緊緊的貼著腳面，但又不覺得有不自然的壓迫感，鞋和腳都溶為一體。第二天我急不及待的就已著住對新 Pump 返學，諗住炫耀一下，冷不防記不起以往著住對新 Pump 返去的都沒有好下場，結果．．．我就成了另一個被魚肉的受害者，唉！v_v
兩 個 第 一 次
這對 Reebok Pump 陪了我都有成好幾年呀，雖然俾我著到好殘好舊，鞋面花晒又爆線，鞋底又磨到蝕晒，個 Hexalite 又想甩出o黎咁； 但話晒都係我o既戰鞋嘛！個 Pump 又 work 得，著住佢好鬼舒服 o架 (就算上到大學都會俾 o的多手 o既朋友仔得閒玩下 ^_^，又試過有次約了一班舊同學去燒烤，七個人有六個人都係著 Pump，幾齊心呀！)。 而晌宿舍，平日著衫可以好 casuel，T-shirt 短褲加對唔縳鞋帶o既 Pump，係我既至愛。
入了大學，平日的開支再不能像中學般由屋企俾 (雖然好裙腳，但我其實覺得自己好幸運，屋企有能力可以供日用到中學畢業)，便要找兼職做。憑我有一技之長，很快便找到了一份教琴的兼職。收入雖然不多，都可以足夠自用。第一個月出糧時，手拿著第一份人工，心情特別覺得興奮，要好好獎勵一下自己，所以很快就決定了怎樣去用這一份糧－－用自己賺回來的錢買一對波鞋！我更對自己說，我要買的必定要是我從未曾著過、擁有過的 Nike！
放工後獨自走到花園街逛逛，在云云的鞋舖裏去找一對自己所喜歡的波鞋。邊看邊想：Nike 最出名的自然是它的氣墊啦！看在廣告中運動員所穿的，豈不大部份都是可見式的氣墊鞋？ (否則怎拍到壓踏氣墊及反彈的過程)？當時佐敦第九、十代雖然很流行，但他們就是欠了這一樣。結果，我揀選了一對當時最新款的氣塾鞋：後置２７０度全氣墊的 Air 2 Strong Mid，更即時著上它。第一次親身的感受氣塾的彈力和承托力，我刻意地在路旁邊用力踏多幾下，感覺是：超正！
及後開始出來工作，懂得賺錢後，開始把人工的一部份特別留作買新鞋用。現時平均每個月我都會買一至兩對新鞋。有些是平日穿的，有些卻是留作欣賞之用，也由此起，自己真真正正的把儲波鞋作為一種嚐好。回想之下，或可能是以前小時候自己很難才得到一對波鞋，現在要稍稍離補一下滿足感吧 :D 。
我 的 收 藏
現在我究竟擁有多少對波鞋？大約一百多對啦。當中 Nike 就佔了四分之三。基本上，除了很少數外會買兩對：一對著一對儲之外，大部份都只會買一對。所有的鞋款都可以到 我 的 珍 藏 中看到。想知道的話，還不快快的連上去看？ :P
Last updated: 14-08-2001 19:38:45
