《Smap之S map 2000 Concert》∼　香取雪子

前奏：

今年真係好好彩，去之前已經知道有兩張飛，即秋田果兩場都可以看到，Yeah！不過，經濟異常拮据的我，差點要打消去見大口仔一面的念頭，但又受不住正價飛的誘惑，結果左踱右踱，終於得o左。錢愁完又要愁住宿、機票（不過煩o既原因咪又係錢作怪，窮人就特別愁過人架啦！）可能因為今次去o既地方唔係日本蒲點
— 東京，所以大家對呢個遙不可及的秋田大館市存在一點點的恐懼，摶命搵資料，希望能完全適應呢個陌生地，不容有失嘛！萬一…… 去唔到就…… 嗚！嗚！嗚！o架啦！不過就係因為呢個地方冷門，小妹先至可以嘗試到網上訂酒店o既樂趣（實在無一間旅行社肯理我o地），日本人o既工作效率有時都幾快（今次係幾例外o既遭遇），o個頭send application form過去，o個頭就回覆我o地話掂，前後真係唔過24小時，幾好！之後仲收到佢o地用e-mail send比我o既旅遊資料同埋郵寄o既酒店資料，令我覺得internet做o野原來都幾靠得住。有時fax過去都未必有回覆。咦！好似講得遠o左小小添！看完呢個咁長o既前奏，唔知大家仲有無心機繼續看我o既苦難篇呢？

苦難篇1：

我發覺internet表面好似好掂，原來佢都有一d做唔到o既地方。唉！初時我o地以為可以坐兩晚通宵火車（去秋田回東京前後兩晚），咁又省回一筆酒店錢，點知天真o既SMAP fans實在太信internet上o既資料，當我o地面對著綠色窗口（JR's Green Window）o既純正日本服務員（唔好諗住佢o地有小小、小小咁多認識英文字母小姐，英文 — no way！）九唔搭八o左一輪後（小妹o既日文又被迫大跨一步了！）先至知道我o地o既JR East Pass唔可以訂o個隻通宵JR，而且就算比錢都full o左。咁即係話我o地要改變計劃早一日去遲一日返東京（前後四日？係個荒野度？嗚！嗚！）死！住係邊呀！終於比我o地訂o左酒店，其實臨時做o既o野都唔差呀！至少間酒店真係好大同好近車站，不過豪華o既背後咪又唔係錢作怪！又買少一樣野lu！

所謂禍不單行，本來我o地已經訂好JR坐位，以為可以舒舒服服咁坐三個幾鐘去秋田，點知……
我o地D飛呢！唔係呀嘛！漏左係行李裡面，o下，返去趕唔切班車啦！無奈地折回，無奈地在一架擠滿人的車廂內企了個多兩個小時才可爭回一張舒適的坐位甜睡片刻。緊張o既情緒在那一刻終於得已釋放。

演唱會前後 (03/11）：

秋田o既紅葉真係幾掂，尤其是Dome前果d，真係幾靚，今年見唔到電視台送比SMAP o既道賀花牌，但就多o左一樣好鬼有排“長”o既紅黃藍logo車隊，都幾sharp幾“正”。不過場外就少o左d質素嘛嘛但極之旱貴o既場外相。買記念品o既人龍如常地長。待我o地激戰三百六十個回合後，便開始停下來欣賞演唱會場地、攤擋（有SMAP舊CD賣，仲有海報送，好鬼抵呀！）、同埋同路人。化裝o既人好似無上年橫濱咁多，d人好似樸素d。哇！佢o地彩排緊呀！佢o地唱緊歌呀！個心開始有d興奮嘄！因為要幫v仔買黃牛飛，所以先發覺秋田d飛的確比東京或者大阪平d，可能實在太荒涼啦！黃牛黨o既積極反而令我覺得有D煩。老實講，一個幾好o既位（around B block但近花道位）都係四、五萬yen，比起東京真係平一截，不過……
對窮人雪子來講，都係天文數字。

排o左一輪隊，終於都可以入到會場啦！比起橫濱o個個三萬幾人棒球場，呢個Dome真係好細，就算stand位都唔算好遠，同灣仔會展差唔多，我o地第一場o既位置好好，台前第三行，花道o既第二個block，唔駛用望遠鏡都可以看得清楚。老實講佢o地唱了甚麼，跳了甚麼，真係唔係好記得，因為慎吾仔，我o既大口仔一早已經電暈o左我。開始時，唔知點解，佢陰陰嘴咁對住我o地笑（唔通係我o地套1.1.1.戰衣太過殺食？？），真係好靚仔，上年望唔清大口仔個樣極度咀喪o既我，今年真係得賞所願，我已經唔記得大口仔同我笑o左幾多次，佢個樣比起上鏡靚仔d，不過就同電視一樣咁高大、滑溜。佢成場都好元氣（精神），走來走去，好識fans，成日同佢o地揮手，裂咀大笑。成場佢o地都無大錯誤，甚少走音，好high，木村比真人還要漂亮，無錯！係漂亮，靚仔得有d似女仔，Goro就同上鏡差唔多…… （靚仔囉！我驚出唔到門口呀！）白白淨，都有揮手，但都有對住我o地微笑，都幾cool（可能係形象問題啦！），阿剛就明顯倦d，但見到我o地呢班木村、香取、吾郎fans都有同我o地揮手，真係幾好人，而中居唔知係咪有太多節目要錄，定係年紀問題，明顯體力不足，常常要休息，而且佢唔係幾望fans，唔似Shingo同木村咁搵番自己d fans比反應。但係中居就真係幾靚仔，不過就細o左一個碼。雖然今年呢個concert無特別主題（梗硬分開個SMAP話有意思，紅黃藍三元色都可以做封面），但係concert裡面，又見到D心思，慎吾媽媽o個part又特登錄o左d短片，中居又有童年照，又有佢o地配音o既動畫短片，大體上都無欺場，而且佢o地又真係幾pro.，d新歌新舞都記熟晒，有時都好想知佢o地花o左幾多時間係彩排方面，定係佢o地經過十二年o既奮鬥，已經熟到毫無難度呢？

當我o地用盡所有力氣去呼喊我o地o既王子o既同時，三個鐘好殘忍咁就行過o左，無錯，今次比起上次二個半鐘係多o左半個鐘，但就係因為太近，太“正”，呢三個鐘對我o地來講，都好似食個即食麵咁快，仲有d唔夠喉添！當我o地變回灰姑娘o既時候，一切已經太遲啦！

苦難篇2 ：

無錯！我o地好幸運咁迫o左上一架連企係度都有d困難o既小巴型巴士，滿心歡喜地遙望大館車站，準備乘搭那天十點幾o既尾班車回秋田 — 阿拔仔酒店。點知，真係人算不如天算，原來10分鐘o既車程，竟然因為塞車而變o左30分鐘（唔好意思，我無記錯應該係起碼9:50先至迫到上車），唔係，係30分鐘後我o地跟o左另外幾個日本人落車，好天真咁以為可以靠自已o既力量行到終點，好可錯，著住3吋高跟鞋o既我（如果唔係咁我點同大口仔對望呀！），真係無力行啦！其他o既人都開始疲態畢露，於是我o地企圖叫的士（錢係o個一刻已經唔重要啦！記住只係o個一刻），不過係o個一刻先令我領會到有錢都得唔到o既無奈，儘管油站o既好心日本人肯同我o地call的士，所有的士都full晒，而在極度絕望底下，竟然又有一部救命的士駛近我o地，所以話強求係無用o既！當大家踏上的士，正在為自己o既幸運而喝采o既同時，另一個惡運又隨之而趕至。

當然，聰明o既你都估到我o地在一輪混戰後，又點可能趕得切架JR！見到車站聚集十幾人，仲有幾個日本女子（無錯，又係SMAP fans）同個站長糾纏緊，於是乎我又加入戰陣，又發揮果d九唔搭八o既日文功，只係聽見站長扮晒無辜咁話已經延遲o左30分鐘，而且架巴士o既負責人又話已經無人會到車站先至開車，（係喎！我o地係途中已經落o左車，獨自上路喎！）算啦！而家講咩都無用，佢已經變為一個無貢獻o既出氣袋，不過佢提出o左一個我o地唔願接受但又無計可施o既方法，就係…… 開個車站比我o地目訓，直接等第二朝早o既JR，OK！唔通搭的士返去酒店咩！實在豪唔起呀！於是乎J仔又發揮佢在任何情況下都目訓到，火燭都唔知o既本領，而我，實在攪唔掂張硬板木凳，成身好似比人打完咁，見到人o地有便當食，於是向o個兩個smap fan請教去路。好難忘！真係好難忘！我未試過在一個著o左羽絨都咁凍，仲要黑漆漆、鬼影都無隻o既情況下，同C仔兩個人估o下估o下咁去搵間便利店，好驚呀！好彩最後都比我o地搵到，仲要好滿足咁食住個熱騰騰o既肉飽咁行返去車站（我o地係唔會咁自私o既，梗係一袋二袋咁帶返去比我o地o既好戰友啦！）。雖然話有個室內地方目訓o下，但間唔中出現o既乞丐同埋失驚無神整蠱你o既無聊日本青年，真係令我目訓得唔係幾安樂。一早返到阿拔仔酒店，可以做o既事只係沖個涼，然後move d行李去第二間酒店，咁就在大館過o左一晚，最後大家連賽後檢討o既心機都無埋，係concert o既興奮同埋喜悅，換來一對“佳佳眼”。

演唱會前後（04/11）：

係秋田逛o左一陣街，又要坐JR返去大館，今次比上次順利 。
經過3號o既花費後，可以做o既事就係在Dome外留倩影，證明自己有來過嘛！如常咁排隊入場（不過當日就再聽唔到SMAP係Dome內傳出o既彩排歌聲，唔通佢o地只係rehearsal一次?）。今次個位就比較遠，唔可以睇得咁清楚（好掛住3號晚個位呀！）雖然我o地覺得SMAP會知道我o地o既存在，但係因為距離問題，實在唔容易得到佢o地o既回應，好失落！

第二晚o既表演明顯比第一晚差，間唔中聽到佢o地走音，連木村都有（solo隻歌），但係見佢o地就依然元氣，仲high過3號晚。最開心係見到大口仔好禮待d fans，fans拋頂吹氣皇冠比佢，佢就帶上頭玩一陣，然後拋番比佢o地，仲有d拋snoopy公仔比佢，而木村都有執起d禮物，不過就唔係好見到其他人有理會d拋上台o既禮物。點解我坐得咁遠呢！【想打人的其中一個打字員按：真的不明白不用吹灰之力而得到A block和B block票的人，仍會有那麼多抱怨！>_<】真係好想拋支snoopy棒棒比佢玩呀！唔好問我佢o地talking part講乜，真係聽到d，又聽唔到d，失敗！睇來都要苦練3、5、7年先可以同d日本人一齊笑住咁比反應SMAP囉！

觀後感：

看完SMAP concert後上癮，相信好多SMAP fasns都認同，因為現場o既感覺真係好唔同，好有震撼感，好有同佢一齊、一條心o既感覺，呢d係錄影帶度搵唔到。只不過年年咁去日本法，相信你會以為自己係日本人，香港只會係你搏命搵錢返日本老家o既暫居地。今年得到Lily o既關照（上年都係，好幸福呀！），個位真係幾正，當你試過無敵勁遠o既stand位後（不過encore時o個五分鐘就好近），你唔會再想坐stand，當你試過arena A block之後，你會覺得，唔係，係你直頭覺得d一擲千金去買黃牛飛o既fans好正常。而且要去就去細場，個館細d，你同SMAP五子o既距離又近d，加上d黃牛飛又平d。

不過奉勸各位未睇過o既SMAP狂，如果無信心年年破費為見五子一面，就唔好膽粗粗咁去睇啦！因為你將會好似道友咁，不顧一切去籌錢貼佢o地。到時真係神仙難救囉！或者係日本搵份工做，對我o地呢d狂熱份子來講，會係一個解救方法。我係度諗，如果SMAP係香港人，我o地又有無咁鍾意佢o地？有無咁珍惜去睇佢o地o既演唱會呢？

【演唱會內容補充篇】

演唱會實錄（03/11）：

一開場，全部SMAP fans已經極度興奮，使勁地叫，而SMAP各人明顯好enjoy我o地d歡呼聲，個個面帶笑容。見到啦！見到我個大口仔啦！我隻眼不停咁跟住Shingo走，彷彿呢個世界剩返我同佢一樣。一開始佢行埋我o地度時已經陰陰咀笑，但都好cute，好靚仔，我個心真係high到最頂點，真定假呀！佢望住我笑呀！每一次佢望住我笑時，我都不其然好興奮咁啦住C仔隻手，可能因為我實在太興奮o既關係，多次因舉扇過高而阻礙到C仔視線，加上我勁同C仔講Shingo望住我笑，C仔終於忍唔住用手打o左我個頭一下，係o個一刻…… 唔痛o既！似乎呢一下打唔醒我喎！Shingo萬歲！全場人都好high，不停咁揮動自製扇子同埋燈棒，不過可能場細關係，d燈光（源自各人的燈棒）無橫濱時咁靚、咁感動。

哇！Shingo著白色衫好型、好靚仔呀！（其實個個著白色西裝都好靚仔！）我覺得中居真係好多o野講，吾郎唱solo時（中居、Shingo伴唱），中居不停說話，又唔肯吹電子琴，攪到Shingo都有d唔耐煩，不過可能係想延遲d時間比吾郎換衫出o黎啦！不過真係有d煩。中居吹口風琴都OK啦！間中都有走音，而Shingo就好d，可能打鼓唔駛太多技巧，只要有節奏感就得，所以佢玩得好輕鬆，好醒（大口仔好有才華呀！^0^）！

1.1.1.環節玩爭木凳仔，大口仔開頭幾醒，二次都行中間，無人同佢爭，不過最後都係輸o左，呢一part都幾快完，反而talking part就長d。因為我o地個位太近舞台，但唔近花道，所以佢o地o既talking part，我o地幾乎全部看前面o既大螢幕，都幾無癮！全場中居講o野最多，木村都有搭咀，而吾郎似乎都離唔開比人取笑o既厄運，Shingo同阿剛就比較少說話，不過憑我直覺，我覺得佢o地有時都幾講心情，如果佢o地倦（Shingo特別易看到），就會說得比較少（中居除外，因為佢全場最興奮就係talking part，差唔多係由佢控制大局，真係佢o既拿手戲）。中居同木村都會主動發言，而吾郎、慎吾、阿剛就較被動，回應多。聽到o既只係吾郎好怕搭飛機。

我自己最鍾意係014 o個首music，Lion Heart同埋慎吾媽媽o既OHA。014 Music隻舞好“正”因為小妹都曾經玩過Jazz（查實只係玩玩o下，叫做有嘗試過啦！）知道佢o地真係幾犀利，d login真係一d都唔易，仲好鬼型。而Lion Heart係一首幾感動既情歌，而我見到佢o地個個都好用心去演譯呢首歌，尤其是大口仔（Sorry！隻眼對大口仔極度敏感），佢真係好用心，好正經，唱得好有feel，令到成個氣氛好浪漫。而OHA rock就唔駛講啦！好high，係場外已經見到有人打扮成慎吾媽媽o既模樣，連小孩子也憧得又唱又跳，全場o既人都好齊心咁一邊唱一邊跳，氣氛好熱鬧，連我o地本來一步都唔識都好快上手，開頭有Shingo特登為秋田拍o既短片（相信只有那句“慎吾媽媽已經到o左秋田啦”係每場唔同），佢真係好識做戲，好攪笑，真係估唔到一個靚仔明星，肯咁樣醜化自己，HK o個d得唔得？不過，因為加插o左短片o既關係，首歌變得好短，o黎唔切望真Shingo個樣已經完o左，相信佢都會好感動，因為有咁多人同佢一齊唱一齊跳，真係唔易做得到o架！

同預期一樣有encore，d歌好high，好熱鬧，好似有藍色閃電、Shake、kanshashite。又在極唔捨得o既情況下結束o左！唔記得講除o左白色套西裝外，黑色套西裝都好襯佢o地（顯得Shingo瘦d，又型仔d！）不過今次d衫比上次成熟d，可能因為佢o地都老啦！再扮細路我會吃不消o架！

演唱會實錄（04/11）：

第二場比第一場差小小，好似無第一場咁感動，明顯似做show多過enjoy個show，可能經過第一場，緊張o既心情放鬆o左o既關係o掛（我指佢o地呀！）！我隻眼照舊死跟Shingo，不過因為遠o左o既關係，成個stage都看得清楚，有時Shingo走遠我o既視線範圍，我就唯有望o下佢o地跳舞（sorry，佢o地跳舞係好“正”，但呢d o野可以係video tape度看嘛！但真人慎吾仔就無咁易o架啦！）我發覺原來Happy Train o既前奏係Shingo同木村一pair跳o既（因為係旁邊花道跳，第一場跟本看不見），先比我發現佢o地都唔係跳得好熟，要一路唸一路跳，佢兩個仲對笑o左幾次，唔知係唔係跳錯o左呢？定係大家取笑大家都記唔熟d舞呢？

今次talking part就無上次咁長，都有講吾郎搭飛機o既趣事（由木村親自講述），點解我一d都聽唔到Shingo講了些什麼呢？只聽到佢話鍾意“愛之燈”首歌，仲話因為有愛o既感覺喎！

有d唔明點解中居要練o個首歌做solo，雖然佢走走o地音，但又好有感情，好有feel咁，都幾感人o既。而木村o既solo就第一晚唱得好過第二晚，雖然佢唱得好小心，但可能因為無rehearsal（我唸咋！），所以把聲唔係幾開，加上個髮型…… 木村迷唔好打我呀！真係幾奇怪，上面直，髮尾向外曲，好似…… 總之好奇怪啦！其他人o既髮型就無改變到。

1.1.1.玩障礙賽，踩單車上斜，穿過地網，射籃球、鬥快「蚊」廁紙。Shingo可能因為身材較豐滿，加上架單車太細，佢踩極都上唔到斜路，試過幾次都失敗，o個一刻，我除o左想笑之外，仲替佢擔心 － 會唔會碌o左落地下受傷o架！好彩！佢試o左幾次後就好醒咁用腳住架單車行上去。不過，最終都輸o左，因為開頭浪費太多時間啦！

今場，我地o既GG小姐好努力咁搶到銀色帶子（其實真係普通過唔普通，只係因為SMAP concert度搶番o黎，就會變得好珍貴），而我就好想拋到snoopy棒棒比Shingo或者錯誤地接到佢帶完之後拋番落台o既帽。可惜！有機會下年o黎過啦！

唔知係唔係室內既關係，佢o地唱個首關於“雪”o既歌時，一d都唔凍，仲覺得佢地好誇張添，可能未有耐到Christmas，所以唔係幾feel到o個一刻o既氣氛。仲有，今年因為已經入秋o既關係，看不見他們除衫露兩點 － 失敗，上年又唔除（只有Takuya除外），今年又看唔到。 >_<

總括來講，SMAP Concert真係有無可抗拒既魅力，三個鐘頭己經足夠令你難忘一世，o個種興奮（成場都企係度，好high咁揮扇，跟佢o地又唱又跳），o個種一致o既投入感覺真係好難得，而家係咪應該儲錢呢？

後錄：

一路寫，一路看回99年o既concert，突然唸到吾郎點解上年係吊臀時成日捉住個欄，原來佢畏高既（因佢驚坐飛機嘛！）！仲有，今年o既Shingo比上年fit d！

特別鳴謝屋主牛奶妹公主勞心勞力幫我呢個有靚位都唔知足o既衰人申請concert飛，無言感激，希望有朝一日能幫公主係菅野o既手搶番吾郎返來以身相許作為報答啦！

仲要同 C 仔講句唔好意思，阻住佢欣賞大口仔o既美貌！同埋幫我呢o個懶人打呢篇長到自己都唔信o既report！Thx!!!

仲有多謝 Yuka San 同埋 Maeda San 幫忙抽concert飛，日本人萬歲！