大家應該會覺得好奇怪，亞廖最鍾意0既電影竟然會係一部愛情片！咩呀，唔得咩？！你理得我丫！其實我認識呢套電影，係因為一首我最鍾意0既英文歌∼Bertie Higgins 0既Casablanca（即係響我首頁0既midi），聽過呢首歌，已經對呢套戲有好感，睇完之後，嘩！直情好睇到冇聲出呀！（不過話時話，Bertie Higgins 0既Casablanca 唔係北非諜影0既主題曲，As Time Goes By 先至係）

　其實北非諜影呢套戲裡面一個間諜都冇嫁，所以我都係鍾意佢個英文名 Casablanca 多D，浪漫 D 丫嘛∼顧名思義，呢個古仔就係發生響法屬摩洛哥0既卡薩布蘭卡，男主角係開 Rick's Cafa Americain 0既 Richard "Rick" Blaine （Humphrey Bogart 飾），外冷內熱，因故得到兩封過境信；恰巧捷克藉0既地下反抗軍領袖 Victor Laszlo 同佢0既妻子 Ilsa Lund Laszlo （金像影后 Ingrid Bergman，靚！同柯德莉夏萍有得揮！）到左 Casablanca ，Rick 發現 Ilsa 竟然係曾經響巴黎負過佢0既人 ......呢個時候，壞蛋出現，一個係納粹德國0既少校，一個係牆頭草Casablanca 0既肥仔警察首長，佢地一齊諗計想留住（順手陷害） Victor ，而佢地又真係做得到0既。之不過，Rick 有兩份通行證喎，結果 Ilsa 去左搵 Rick......之後就咁咁咁喇∼哈哈∼有興趣就自己睇啦，我 up 晒會俾雷劈嫁∼∼

　唔，大家睇睇個古仔，其實都好老土下，又係D 三角戀呀，情義兩難存呀咁，不過橋唔怕舊，拍出黎一樣咁好睇！佢除左呢 D 野之外又有其他野可以表達出黎0既，四二年仲係二戰嘛。成套戲0既演員又係好戲0既，個個都有唔同0既性格，唔會好似一 D 垃圾片咁個個都係 flat charater，而且仲有 D jazz 聽下，爽呀！戲裡面除左結局之外，中間有一幕Rick's Cafa 所有客人唱法國”0既馬賽進行曲”對班德國佬0既The Watch on the Rhine 都唔錯，果班德國佬唔夠人唱，塊面"火農"到隔住個mon 我都聞到呀∼

　呢套戲個來頭都唔小嫁，拎左43 年奧斯卡0既最佳導演、影片同劇本（同八個提名），又得到 American Film Institute's 0既美國電影史上最佳電影得二位，不過拎唔拎獎都冇乜所謂，我鍾意就得啦∼